Kosova në fokus të qëndrueshmërisë në KTH Royal Institute of Technology

Kosova prezantohet në KTH Suedi si rast studimi për zhvillim të qëndrueshëm

Për herë të parë, Kosova u prezantua sot si rast studimi në Universitetin Mbretëror të Teknologjisë në Suedi (KTH), në kuadër të programeve “Global Development Hub” dhe “Re-Imagining Mobility Lab”. Iniciativa u udhëhoq nga Dr. Liridona Sopjani, ish-doktorante e KTH-së dhe tashmë ligjëruese e asocuar dhe hulumtuese e lartë prej katër vitesh në këtë institut prestigjioz, përcjell albinfo.ch.

Diskutimet u përqendruan në sfidat dhe potencialin e Kosovës në fushën e zhvillimit të qëndrueshëm, duke zgjuar interes të madh tek studentët dhe studiuesit ndërkombëtarë. Aktiviteti u pasurua me prezantimin e një qilimi tradicional shqiptar, i cili simbolizoi Odën shqiptare – vendin e bashkimit dhe vendimmarrjes – duke sjellë një dimension kulturor në debatin akademik.

Ky prezantim shënon një hap të ri në drejtim të shkëmbimeve akademike dhe përfshirjes së Kosovës në projektet ndërkombëtare për qëndrueshmëri, duke hapur rrugë të reja për bashkëpunim shkencor dhe institucional.

---