Sipas një njoftimi për shtyp nga zyra e ministres për Dialog, Edita Tahiri, thuhet se delegacioni kosovar do të kërkojë nga drejtoresha për çështjet e Evropës Juglindore të Shërbimit të Jashtëm të BE-së, Angelina Eichhorst, të shtojë presion tek  Serbia të heq bllokadat dhe zbatojë marrëveshjet për çështjen e kodit telefonik shtetëror për Kosovën, pavarësimin e KOSTT-it dhe largimin e barrikadës nga ura e Mitrovicës.

“Ministrja Tahiri do të ritheksojë qëndrimin e Qeverisë së Republikës së Kosovës se mos zbatimi i këtyre marrëveshjeve nga ana e Serbisë, flet qartazi për shkeljet serioze që pala serbe ia bënë marrëveshjeve të Brukselit të nënshkruar nga Kryeministrat e dyja shteteve dhe Përfaqësuesja e Lartë e BE-së, Mogherini”, thuhet në këtë  njoftim.

Po sipas këtij njoftimi, ministrja Tahiri do t’i njoftojë autoritet e BE-në zbatimin e marrëveshjes për drejtësinë dhe vendosjen e sistemit unitar të drejtësisë në veri të vendit në muajin tetor, si dhe të një numri të madh të ministrive dhe agjencive qendrore, të cilat pritet të nisin punën në vjeshtë.

“Ajo do të ngritë shqetësimet në lidhje me disa veprime destruktive të Serbisë dhe  pretendimet për ndërtime ilegale që po ndikojnë në ngritjen e tensioneve dhe pakënaqësive dhe që mund të jenë destablizuese për situatën e mirë të sigurisë që e kemi arritur me mund të madh në saje të dialogut të Brukselit”, thuhet më tej në njoftim.