Kosova ndalon importin e shpezëve nga Gjermania

Agjencia e Ushqimit dhe Veterinarisë së Republikës së Kosovës (AUV) ka marrë vendim për ndalimin e menjëhershëm të importit të shpezëve dhe produkteve të tyre nga Gjermania, pas konfirmimit të rasteve të gripit të shpezëve me patogjenitet të lartë (HPAI – H5N1) në disa ferma gjermane.

Sipas njoftimit të AUV-së, ndalesa përfshin shpezët e gjalla, mishin, vezët dhe nënproduktet e tyre që kanë origjinën nga territori i Gjermanisë. Ky vendim është marrë si masë parandaluese për mbrojtjen e shëndetit të kafshëve dhe sigurisë ushqimore në Kosovë.

“Kjo ndalesë hyn në fuqi menjëherë dhe do të mbetet në zbatim deri në vlerësimin e mëtejshëm të situatës nga autoritetet përkatëse ndërkombëtare dhe nga AUV”, thuhet në njoftimin e agjencisë.

AUV ka bërë të ditur se do të vazhdojë monitorimin e situatës epidemiologjike dhe bashkëpunimin me institucionet vendore dhe ndërkombëtare për të parandaluar përhapjen e sëmundjes në territorin e Kosovës.

Publiku dhe operatorët ekonomikë, sipas agjencisë, do të informohen me kohë për çdo ndryshim eventual në këtë vendim.