Kosova merr pjesë në samitin e Wall Street

Zëvendëskryeministrja dhe ministrja e Tregtisë dhe Industrisë, Mimoza Kusari – Lila, e ka përfaqësuar Kosovën në samitin e organizuar nga rrjeti “M&A Advisory” në Wall Street të New Jorkut.

“Përpara qindra bizneseve ndërkombëtare, investitorë, politikanë, përfaqësues të bankave dhe përfaqësues të medieve më të njohura ministrja Kusari – Lila prezantoi potencialin dhe mundësitë që ofron Kosova për të bërë biznes”, thuhet në komunikatën e MTI-së.

“Kosova ka popullatë të re të gatshme për punë, pasuri natyrore, pozitë të volitshme gjeografike, politika që përkrahin sektorin privat dhe mjedis biznesor që po përmirësohet nga viti në vit”, citohet të ketë thënë Kusari-Lila.

Ajo po ashtu ka deklaruar se ekonomia e Kosovës dhe shoqëria si tërësi ka kaluar e fundit tranzicionin në rajon, që nënkupton se reformat e ndërmarra janë shqyrtuar me shumë kujdes, duke seleksionuar praktikat më të mira të vendeve tjera.

“Orientimi strategjik i qeverisë tonë bazohet në zhvillimin e qëndrueshëm ekonomik dhe se ka arritur të krijojë mjedis të qëndrueshëm makroekonomik”, ka theksuar Kusari-Lila.

Rrjeti “M&A Advisory”, në dhjetëvjetorin e organizimit të samitit, për herë të parë kanë përfshirë Ballkanin si pjesë e këtij samiti. Pas përfundimit të takimit të parë është parë interesim i madh për rajonin e Evropës Juglindore.