Kosova kërkon disenjator për viza

Ministria e Jashtme e Republikës së Kosovës ka ftuar të gjithë disenjatorët të aplikojnë me projektet e tyre se si do të duhej të duket viza e Kosovës për shtetasit e huaj

Kosova tash e një vit ka vendosur të aplikojë viza për një seri shtetesh, si obligim i veçantë nga udhërrëfyesi për liberalizimin e vizave. Në Kosovë që nga kjo verë, shumë shtetas të shteteve të ndryshme, sidomos nga Afrika dhe Azia, nuk do të mund të hyjnë pa u pajisur me vizë kosovare në ndonjë Ambasadë të Republikës së Kosovës.

Procesin e disejnimit të vizave kosovare për shtetasit e huaj e ka bërë publike zëvendësministri i Jashtëm i Kosovës, Petrit Selimi, nëpërmjet një mesazhi në rrjetin social Twitter.

Gara kombëtare për dizajnin e vizave do t’i sjellë edhe 2000 euro fituesit, i cili po ashtu do ta ketë nderin ta ketë dizajnin e vetë në mijëra viza që do të lëshohen në vitet e ardhshme.

Norvegjia ka financuar me 2 milionë euro sistemin e vizave Shengen për Kosovën, që do të implementohet nga organizata “IMG”.

Në Ministrinë e Punëve të Jashtme të Kosovës  thonë se kjo është një formë e mirë të informohen edhe qytetarët për procesin e liberalizimit të vizave ndërsa dizajni duhet të jetë i ngjashëm me ato të vizave Shengen, pos elementeve dekoruese dhe atyre të sigurisë që mund të përmbajnë elemente shtetërore dhe dekorative.