Kosova ka rreth 70 mijë studentë

Numri i përgjithshëm i studentëve në arsimin publik universitar, sipas ASK-së, është 69 220. Në Universitetin e Prishtinës studiojnë 53 248 studentë

Rreth 70 mijë të rinj janë duke vazhduar studimet universitare nëpër gjashtë universitetet publike të Republikës së Kosovës, ndërsa numrin më të madh të studentëve e ka Universiteti “Hasan Prishtina” në Prishtinë, me 5320 studentë. Këto të dhëna janë publikuar sot nga Agjencia e Statistikave të Kosovës (ASK) në raportin “Statistikat e Arsimit 2014/2015”.

Numri i përgjithshëm i studentëve në arsimin publik universitar, sipas ASK-së, është 69 220. Në Universitetin e Prishtinës studiojnë 53 248 studentë, në Universitetin e Prizrenit 5 719 studentë, në Universitetin e Pejës 5 271 studentë, në Universitetin e Gjilanit 1 533 studentë, në Universitetin e Gjakovës 736 studentë dhe në Universitetin e Mitrovicës 2 713 studentë.

Ky publikim i ASK-së, ofron të dhëna për arsimin parashkollor, arsimin fillor dhe të mesëm të ulët, arsimin e mesëm të lartë, arsimin fillor, të mesëm të ulët dhe të mesëm të lartë special, si dhe të dhëna për arsimin universitar.

Sipas rezultateve të dala nga ky publikim, numri i fëmijëve në çerdhe dhe parashkollor në arsimin publik ishte 25 928, ndërsa në arsimin privat ishte 317. Numri i nxënësve në arsimin fillor dhe të mesëm të ulët publik ishte 273 649, ndërsa në arsimin privat ishte 2 238.

“Numri i nxënësve në arsimin e mesëm të lartë publik ishte 83 743, ndërsa në arsimin privat ishte 2 476. Ndërsa në arsimin fillor dhe të mesëm të ulët special vijojnë mësimet 307 nxënës, ndërsa në arsimin e mesëm të lartë special 138 nxënës”, thuhet në raportin  e ASK-së për Arsimin, transmeton Albinfo.Ch.