Kosova e atakuar nga fukarallëku

Këtë vit ka pasur rënie të eksporteve për 24.4 për qind, rënie të remitencave për 4.8 për qind dhe të investimeve të huaja 27.6 për qind

Zhvillimi ekonomik në Kosovë në krahasim me vitet e shkuara, sivjet ka shënuar rënie, nga 5 për qind në 3.8 për qind, ndërsa këto parametra tregojnë se papunësia dhe varfëria do të shënojë rritje. Sipas statistikave, në Kosovë edhe më tej vazhdojnë të jetojnë rreth 12 për qind e popullsisë me një euro në ditë. Sekretari i Odës Ekonomike të Kosovës, Berat Rukiqi i ka thënë për REL, se rritja 3.8 për qind siç ka thënë Banka Qendore, në perspektivën afatshkurtër, nuk është rritje e mjaftueshme, duke pasur parasysh që Kosova, sipas tij, ka nevojë për dyfishin e rritjes ekonomike aktuale. “…mbajtja e ritmit të rritjes është me rëndësi, po duhet përfundimisht të bëhen përpjekje që të dyfishohet kjo, dhe tash perspektiva mund të jetë në implementimin e suksesshëm të projekteve në energji dhe telekomunikacion, perspektiva mund të jetë në anëtarësimin në BERZH, për shkak se anëtarësimi në BERZH mundëson qasjen e fondeve zhvillimore”, thotë Rukiqi. Ndryshe, sipas Bankës Qendrore të Kosovës, këtë vit ka pasur rënie të eksporteve për 24.4 për qind, ngritje të importeve, rënie të dërgesave të emigrantëve për 4.8 për qind, e po ashtu rënie të investimeve të huaja direkt prej 27.6 për qind. Sipas Rukiqit, këto të dhëna janë treguesi më i mirë për gjendjen, në të cilën ndodhet ekonomia e Kosovës. “Kjo rritje ekonomike nuk mund ta zbusë papunësinë. Rënia e remitencave, rënia e investimeve ndikojnë që Kosova edhe për një kohë të gjatë të ketë këtë gjendje të vështirë ekonomike”, thotë Rukiqi. Në Kosovë, sipas të dhënave të fundit të Bankës Botërore, në vitin 2009, varfëria ishte 34 për qind e gjithë popullsisë. Sipas këtij raporti, rreth një e treta e popullsisë në Kosovë jeton në kufirin e varfërisë absolute me 1.55 euro në ditë, ndërsa 12 për qind jetonin në farfuri të skajshme me 1.02 euro. Ndërkaq, papunësia thuhet të jetë mbi 48 për qind. Kosova ka një popullsi rezidente rreth 1.8 milionë banorë, ndërsa rreth 75 për qind e popullsisë janë nën moshën 35 vjeçare.