Kosova dhe Sierra Leone, vendosin marrëdhënie diplomatike

Republika e Kosovës dhe Republika e Sierra Leones kanë nënshkruar marrëveshjen për vendosje të marrëdhënieve diplomatike në mes të dy shteteve

Në një ceremoni zyrtare organizuar në Konsullatën e Përgjithshme të Republikës së Kosovës në Nju Jork, i ngarkuari me punë në Konsullatën e Përgjithshme, Ylber Kryeziu, dhe Ambasadori i Republikës së Sierra Leone në Organizatën e Kombeve të Bashkuara, Vandi Chidi Minah, në emër të dy shteteve kanë nënshkruar marrëveshjen për vendosje të marrëdhënieve diplomatike.

Sipas një njoftimi lëshuar nga MPJ, palët janë pajtuar për të intensifikuar komunikimin politik, për të iniciuar nënshkrimin e një memorandumi të bashkëpunimit në mes të dy akademive diplomatike dhe për përgatitjen e një marrëveshje për promovim dhe mbrojtje të investimeve.

“Ambasadori Vandi Chidi Minah ka shprehur gatishmërinë e Qeverisë së Sierra Leone për të ngritur marrëdhëniet dypalëshe në nivele sa më të larta dhe për të mbështetur Kosovën për njohje të reja nga Unioni Afrikan”, thuhet në deklaratën e MPJ-së së Kosovës, transmeton Albinfo.Ch.

Ndryshe, Sierra Leone është shtet anëtar i Kombeve të Bashkuara me mbi 6 milionë banorë dhe është një ndër prodhuesit më të mëdhenj të titanit dhe boksitit në botë. Republika Siera Leone ndodhet në pjesën perëndimore të Afrikës dhe në pjesën perëndimore të vendit gjendet dalja në Oqeanin Atlantik.