Konfirmohet nga Stoltenberg: Po e shqyrtojmë “praninë e qëndrueshme” në Kosovë

Sekretari i Përgjithshëm i NATO-s, Jens Stoltenberg, ka konfirmuar sot se në Samitin e Madh të ministrave të punëve të jashtme të vendeve anëtare që mbahet nesër dhe pasnesër, një nga temat kryesore të diskutimit do të jetë situata e sigurisë në Kosovë dhe në gjithë Ballkanin Perëndimor.

Stoltenberg në një konferencë për shtyp në Bruksel u shpreh se “kemi parë dhunë serioze në veri të Kosovës, retorikë ndarëse e shkëputëse në Bosnjë e Hercegovinë dhe tentime malinje të ndërhyrjeve, përfshirë ato nga Rusia”, teksa përmendi për një prani më madhore të NATO-s në Kosovë.

“Bashkë me Përfaqësuesin e Lartë të BE-së, Josep Borrell, ne do të diskutojmë mënyrat që të rrisim stabilitetin në rajon. NATO-ja tashmë ka shtuar 1000 trupa në Kosovë. Dhe ne jemi duke ekzaminuar një prani më të qëndrueshme në Kosovë”, ka thënë ai, përcjell albinfo.ch.

Ndërkaq, ai i bëri thirrje Kosovës e Serbisë që menjëherë t’i kthehen dialogut që udhëhiqet nga Bashkimi Evropian.

“Beogradi dhe Prishtina duhet të riangazhohen në dialogun e lehtësuar nga Bashkimi Evropian. Stabiliteti varet nga të gjitha palët që zgjedhin dialogun dhe diplomacinë, në vend të konfliktit dhe kaosit”, ka thënë tutje ai.