Koleksioni “Gurlitt”, pritet me shumë dilema në Bernë

Prokuroria e Augsburgut e kishte sekuestruar koleksionin me dyshimin se një pjesë e tij është art që nazistët e kanë grabitur nga hebrenjtë

 Cornelius Gurlit është emri i koleksionistit të veprave artistike, te i cili vitin e kaluar ishin gjetur një numër i madh i pikturave që ishin pronë e hebrenjve para Luftës së Dytë Botërore, të grabitura nga nazistët. Kur vitin e kaluar ishte zbuluar koleksioni i pikturave të tij kjo kishte qenë lajm i dorës së parë në mediet gjermane dhe botërore. Ndërkohë, dy ditë më parë Gurlit ka ndërruar jetë në moshën 81 vjeçare.

Tash lajmi më i ri që po bën jehonë në medie është vendimi që Gurlit e kishte lënë në testament për të bartur koleksionin e tij në Muzeun e Arteve të Bernës.

Koleksioni i Cornelius Gurlitt përfshin edhe vepra të piktorëve të mëdhenj si Picasso, Chagall, Matise etj.

Prokuroria shtetërore e Augsburgut e kishte sekuestruar koleksionin me dyshimin se një pjesë e tij është art që nazistët e kanë grabitur nga hebrenjtë.

Reagimi i qytetit të Bernës lidhur me lajmin se koleksioni “Gurlit” vendoset në Bernë ka qenë i përzier. Kryetari i Bernës, Alexander Tschäppät është shprehur i gëzuar se qyteti i tij po bëhej seli e një aksioni kaq të çmuar, shkruan srf.ch. Por ai ka shtuar se gëzimi duhet të jetë i matur, pasi që janë edhe shumë dilema morale e ligjore që duhet të sqarohen.

Sipas tij, babai i koleksionistit Gurlitt ka qenë tregtar veprash artistike në shërbim të Hitlerit, kështu që ka shumë rëndësi të sqarohet prejardhja e veprave artistike të përfolura.