Klori nuk mjafton kundër disa parazitëve dhe baktereve në pishina, si të mbrohemi

Pishinat duket se janë vende të sigurta për not, por edhe aty mund të rrezikoheni nga infeksione të ndryshme  nga skuqjet e lehta të lëkurës deri te problemet më serioze të stomakut. Edhe pse shumica e rasteve nuk janë të rrezikshme, një infeksion mund t’ju prishë pushimet.

Rreziqet e pishinave publike

Qëndrimi në pishina publike dhe parqe ujore nuk është pa rreziqe. Infeksionet e traktit urinar, bakteret Escherichia coli, kërpudhat e lëkurës dhe konjuktiviti janë disa nga problemet më të zakonshme. Shpesh shkaktarët nuk janë vetë pishinat, por vizitorët,  pothuajse 90% e njerëzve nuk bëjnë dush para notit dhe disa “shpërndajnë” bakteret duke u larë në ujë.

Klori është i dobishëm, por jo gjithëpushtetshëm

Klori shkatërron shumë patogjenë, por nuk vepron menjëherë dhe nuk eliminon të gjitha bakteret. Infeksionet më të zakonshme pas notit në ujë jo të pastër përfshijnë problemet e lëkurës, veshit, shqetësimet e stomakut dhe sëmundjet e frymëmarrjes.

Paraziti Cryptosporidium është veçanërisht rezistent. Ai mund të mbijetojë në ujë të kloruar deri në 10 ditë dhe shkakton diarre ujore. Shpërndahet kur lënda fekale nga një person infektuar hyn në ujë dhe më pas gëlltitet nga një notar tjetër. Edhe një sasi shumë e vogël mund të infektojë dhjetëra njerëz.

Bakteri Pseudomonas aeruginosa shkakton skuqje dhe “veshin e notarit”, ndërsa noroviruset dhe adenoviruset mund të mbijetojnë në ujë dhe të shkaktojnë sëmundje të ndryshme.

Erë klori = siguri?

Shumë njerëz mendojnë se një pishinë që ndjen fortë e klorit është më e pastër. Në fakt, erë e fortë klori tregon kloramina,  nënprodukte të reaksionit të klorit me djersën, urinën dhe qelizat e vdekura të lëkurës. Kjo është një paralajmërim që uji mund të jetë i kontaminuar dhe pishina duhet shmangur.

Si të mbrohemi

Për të zvogëluar rreziqet, ndiqni disa masa të thjeshta higjienike:

Bëni dush të paktën një minutë para se të hyni në pishinë për të hequr vajrat dhe papastërtitë nga trupi;

Mos hyni në pishinë nëse jeni të sëmurë ose keni diarre/plagë të hapur;

Shmangni gëlltitjen e ujit;

Nëse keni kriptosporidiozë, prisni të paktën dy javë para se të notoni;

Përdorni banjën rregullisht për të shmangur “aksidentet” në ujë;

Thajini veshët pas notit për të parandaluar infeksionet;

Bëni dush pasi dilni nga pishina për të hequr bakteret dhe mbetjet e klorit.

---