Këto janë shpërblimet për Shqipërinë

Shpërblimi për kuqezinjtë do të nisë që në ndeshjet në grupe, për të cilat mësohet se është parashikuar një shpërblim prej 300 mijë euro për çdo fitore, ndërsa 100 mijë euro për çdo barazim

Kampionati Evropian i futbollit po afrohet dhe për herë të parë pjesëmarrëse do të jetë edhe Kombëtarja shqiptare. Shqipëria arriti sukses historik duke u kualifikuar në një Evropian, derisa tani shpreson të ketë sukses në Francë.

Sipas mediave shqiptare, shpërblimi për kuqezinjtë do të nisë që në ndeshjet në grupe, për të cilat mësohet se është parashikuar një shpërblim prej 300 mijë euro për çdo fitore, ndërsa 100 mijë euro për çdo barazim, shkruan albinfo.ch.

Në rast se kuqezinjtë dalin në vendin e parë në Grupin A, shpërblimi për skuadrën do të jetë 1.5 milionë euro; në vendin e dytë 800 mijë euro dhe në vendin e tretë 600 mijë euro. Kualifikimi për në fazën e 1/16-ave do të shpërblente ekipin kombëtar me një milion euro, ndërsa në fazën e 1/8-ave në shumën 1.5 milionë euro.

Për kualifikimin për në gjysmëfinale, është përcaktuar një shpërblim prej 2 milionë eurosh, ndërsa superbonusi është planifikuar për fitimin e Kampionatit Evropian, plot 4 milionë euro shpërblim.