Këshilli Federal, për shërbimin e detyruar ushtarak

Për secilin qytetar zviceran të gjinisë mashkullore, shërbimi ushtarak (ose ai civil si zëvendësim) edhe në të ardhmen do të mbetet i detyrueshëm. Ky është qëndrim i Këshillit Federal, me të cilin ai hedh poshtë iniciativën për heqjen e detyrimit për shërbim ushtarak. Këtë iniciativë e ka lancuar GSoA (Grupi Zvicra pa ushtri).

Departamenti i mbrojtjes, si arsyetim për mbajtjen e shërbimit ushtarak ka përmendur shkaqet e sigurisë. Sipas tij, në rastet e katastrofave ose kërcënimeve ka shumë rëndësi që të kihet në dispozicion sa më shpejtë që të jetë e mundur një numër i nevojshëm i trupave.

Ndërkaq, GSoA në iniciativën e saj ka kërkuar heqjen e detyrimit ushtarak dhe krijimin e një ushtrie që do të përbëhej nga ushtarë vullnetarë. Veç kësaj, ajo ka kërkuar edhe ngritjen e një shërbimi civil vullnetar që do të ishte i hapur edhe për femrat.