Keller-Sutter: Pranimi i iniciativës së SVP-së, më i keq se Brexit-i

"Ekonomia është dëmtuar mjaft nga kriza e koronavirusit, prandaj nuk ka nevojë që situata të përkeqësohej më tej, duke pranuar nismën e kufizimit".

Këshilltarja Federale, e cila mbulon Ministrinë e Drejtësisë dhe Policisë, Karin Keller-Sutter, të ashtuquajturën “iniciativë e kufizimit” të numrit të të huajve nga BE, të iniciuar nga  SVP, nuk e konsideron si mjet të përshtatshëm për të kontrolluar imigracionin.

“Një PO për iniciativën është edhe më e keqe se Brexit-i”, ka thënë ajo sot për gazetën SonntagsZeitung.

Në rastin kur një (ish) anëtar i BE-së, si Britania e Madhe, donte të largohej nga BE-ja, të dy palët do të duhej të negocionin kushtet e daljes.

Në marrëveshjet bilaterale midis Zvicrës dhe BE-së, megjithatë, asgjë nuk mund të krahasohet, ka thënë ajo, transmeton albinfo.ch. “BE nuk është e detyruar të flasë me ne lidhur me këtë”, ka sqaruar ministrja nga FDP.

Më tutje, Keller-Sutter ka shtuar se një Jo për iniciativën nuk do të thotë Po sa i përket marrëveshjes kornizë të BE-së. Janë ende të nevojshme korrigjime në këtë pikë, ka theksuar ajo.

“Jam e sigurt se një marrëveshje nuk mund të lidhet nëse nuk mund t’i sqarojmë çështjet e hapura për të fituar pajtimin e partnerëve socialë dhe kantoneve”, ka thënë më tutje Keller-Sutter, përcjell albinfo.ch.

Këshilltarja Federale ka paralajmëruar më tutje se ekonomia është dëmtuar mjaft nga kriza e koronavirusit, prandaj nuk ka nevojë që situata të përkeqësohej më tej, duke pranuar nismën e kufizimit.

---