Kapiteni i Kosovës, kampion në Itali

Napoli sapo ka fituar titullin në Serie A, një sukses i jashtëzakonshëm

Napoli është kampion i ri i Italisë. Napolitanët kanë barazuar me Udinesen 1:1 në udhëtim, që i mjaftoi për të fituar titullin kampion, pesë javë pa përfunduar Serie A, shkruan albinfo.ch.

Pjesë e këtij suksesi është edhe kapiteni i Kosovës, Amir Rrahmani. Ai ka qenë titullar në ndeshjet e Napolit dhe një nga lojtarët kyç në këtë edicion. Edhe për të, është një sukses i jashtëzakonshëm.

Rrahmani ka luajtur për Drenicën, Partizanin e Tiranës, Split, Lokomotivën e Zagrebit, Dinamon e Zagrebit, Veronën dhe tani Napolin.

Napoli fitoi titullin e tretë në histori të klubit apo për herë të parë pas 33 vjetësh.

Napoli ka shënuesin më të mirë në ligë, Osimhen me 22 gola, Kvaratskhelia, si asistuesi më i mirë me dhjetë asistime, me sulmin dhe mbrojtjen më të mirë.

Gjithashtu Napoli u kualifikua deri në çerekfinale të Ligës së Kampionëve, hera e parë po ashtu për klubin e Napolit.

Tashmë festa ka filluar në qytetin italian, që kanë pritur me dekada të tëra këtë vit. Festa kryesore do të jetë në stadiumin “Diego Armando Maradona”, edhe pse Napoli po luan mysafir. Për futbollistët pritet një festë madhështore kur të arrijnë në Napoli.

---