Kantonet kundër reduktimit të kontingjenteve të të huajve

Me këtë reduktim qeveria e vendit ka dashur t`i japë ekonomisë një sinjal se ajo në të ardhmen duhet t`ia dalë edhe me migracion më të vogël

Këshilli Federal ka shkurtuar për 2000 numrin e vendeve të punës në kuadrin e kontingjentit për ekspertë nga vendet jashtë BE-së. Me këtë reduktim qeveria e vendit ka dashur t`i japë ekonomisë një sinjal se ajo në të ardhmen duhet t`ia dalë edhe me migracion më të vogël. Por ky veprimi Bernës zyrtare ka hasur në mospajtim të kantoneve.

Nga brenga për mbarëvajtjen e punës në ekonomi, drejtorët e ekonomisë ne nivel kantonesh kërkojnë kontingjente së paku të nivelit të tashëm edhe ne të ardhmen. Këtë dëshirë ata ia kanë shprehur edhe ministres së drejtësisë, përgjegjëse për këtë fushë, Simoneta Sommaruga. Por problemi është se qeveria tashmë e ka bërë reduktimin e kontingjenteve.

“Me rastin e marrjes së vendimeve, kantonet janë konsultuar por në fund vërejtjet e tyre nuk janë marrë në konsiderim”, kritikon Christoph Niederberger, sekretar i përgjithshëm i konferencës së drejtorëve kantonalë të ekonomisë. Sipas tij, shkurtimi nuk e ndihmon ekonominë por është vetëm hedhje hi syve dhe politikë e gabuar.

Vendimi i Bernës ka acaruar sidomos qeveritë e kantoneve Basel-Stadt dhe Basel-Land. Ato kanë protestuar duke i dërguar një letër Këshillit Federal, sipas të cilës, Berna duhet të sjellë një vendim të ri deri në verë.