Kanë filluar manifestimet për nder të 1 Gushtit

Veç festimeve popullore me fishekzjarrë, janë mbajtur edhe fjalimet e para të politikanëve, gjegjësisht të ministrit Maurer dhe atij Berset

Manifestimi tradicional i 1 Gushtit, festës nacionale të Zvicrës, në disa qytete ka filluar më 31 korrik. Kështu një spektakël i madh tradicional me fishekzjarrë për nder të festës është organizuar natën e të martës në Bazel, buzë lumit Rajna.

Në qytet për të parë spektaklin kishin dalë rreth 100 mijë veta, ndërsa programi, i filluar në orën 23, ka zgjatur 25 minuta. Fishekzjarrët janë ndezur nga anijet e Rajnës. Para spektaklit, në qytet ka pasure stenda të shumta festive me muzikë live dhe me ushqime për festuesit. Ndërsa në lumin Rajna është bërë prezantimi publik i anijes zjarrfikëse “Christopherus” dhe një garë i barkave të gomës.

Nga ana tjetër, mbrëmë kanë filluar maratonën e tyre të fjalimeve festive edhe politikanët e Zvicrës. Ministri Ueli Maurer ka mbajtur dy fjalime, njërin në Hinwil (ZH) dhe tjetrin në St. Margrethen (SG), ndërsa ministri Alain Berset në Middes (FR).