Ka filluar festivali i birrës “Oktoberfest” në Munih

“Oktoberfest” është festivali më i madh i birrës në botë. Ky festival është një prej pjesëve më të rëndësishme të kulturës bavareze dhe organizohet që nga viti 1810.

Festivali i 182 i i birrës “Oktoberfest” në Munih ka filluar që nga 19 shtatori dhe do të zgjasë deri më 4 tetor. Hapjen e këtij festivali e bëri kryetari i Munihut, Dieter Reiter.
“Oktoberfest” është një festival që vizitohet nga miliona njerëz. Karakteristikë e këtij festivali është veshja tradicionale, ndërsa vizitorët mund të shijojnë ushqime dhe birra të llojllojshme dhe të argëtohen me muzikë tradicionale të këtij festivali por edhe zhanre të tjera.
Ky festival vizitohet edhe nga figurat të njohura të gjitha sferave jetësore në Gjermani, njofton “albinfo.ch”.
Tendat e këtij festivali nga e hëna deri të enjten janë të hapura prej orës 10.00 – 23.00, të premten deri 24.00, ndërsa të shtunën hapen nga ora 9.00 deri 24.00 dhe të dielën nga ora 9:00 – 23:30.
Për familjarët që vizitojnë së bashku me fëmijë është e rezervuar dita e martë nga ora 12.00 deri në orën 18.00 dhe për të gjithë artikujt do të këtë zbritje të çmimeve.
Hyrja në hapësirën e “Oktoberfest”-it dhe tendave është pa pagesë.

---