Johanes Hanh vizitë dyditore në Maqedoni

Eurokomisari për zgjerim dhe politikë fqinjësore në BE, Johanes Han nesër dhe pasnesër do të qëndrojë për vizitë në Maqedoni

Komisari i BE-së për zgjerim dhe politikë fqinjësore Johanes Han, të hënën dhe të martën do të qëndrojë për vizitë në Maqedoni, për t’i inkurajuar lidershipin në Shkup që t’i vazhdojnë reformat për integrim. Hahhn në Shkup do të zhvillojë takime me liderët politikë dhe ata institucional përfshirë edhe opozitën.

Han, siç u konfirmua deri tani zyrtarisht, do të ketë takime me kryeministrin dhe liderin e LSDM-së Zoran Zaev, me kryeparlamentarin Talat Xhaferi, me liderët e BDI-së Ali Ahmeti, të VMRO-DPMNE-së Nikolla Gruevski dhe të Aleancës së Shqiptarëve, Ziadin Sela.

Në kuadër të vizitës, eurokomisari do të takohet edhe me përfaqësues të sektorit joqeveritar.

“Me padurim e pres vizitën time në Shkup, javën e ardhshme, në kuadër të së cilës do të realizoj takime politike, por edhe takime me përfaqësues të shoqërisë civile”, deklaroi Hahn në Twiter.

“Besoj se Qeveria do ta shfrytëzojë momentin pozitiv dhe se do t’i shohim rezultatet nga reformat e mëtejshme deri nga fundi i vitit. Për këtë nevojitet bashkëpunim konstruktiv i të gjitha forcave politike, duke përfshirë edhe opozitën”, ka deklaruar Hahn, disa ditë më parë.