Jericho mbledh fansat në Cyrih nga e tërë Evropa

Fatmir Haradini kishte bërë qindra kilometra për të ardhur të shtunën mbrëma në koncertin e Jericho-s në Cyrih.

Fatmiri tha se do të kishte bërë jo 800, po edhe 8 mijë kilometra vetëm për të dëgjuar këngët e rok grupit të famshëm kosovar, Jericho, si: Shkaba, Freedom, KLA, Zgjohu, Kur do të pushojë kjo këngë, Tamlin e nënës…

„Secila këngë e Jericho-s ka një domethënie. Dihet për çka po këndon. A ka më mirë se kur dikush e do popullin e vet. A ka më mirë kur dikush proteston nëpërmes këngës”, thotë ky fans i zjarrtë i Jericho-s, që kishte ardhur nga Austria.

Edhe Ekrem Isufi ka ardhur enkas nga Kosova në Cyrih për të përcjellë live koncertin e Jericho-s.

“Jericho mbi të gjitha këndon live. Gjithmonë këngët e tyre kanë një mesazh, të mirë dhe domethënës. Thjesht, më pëlqen muzika e tyre”, tha Ekremi.

“Në qoftë se më bëhet viza, do të kisha shkuar kudo që do të kishte koncert Jericho”, thotë ky i ri nga Kosova.

Organizatori i koncertit të Jericho-s në Cyrih, Fatmir Haziri, ka bërë të njohur për albinfo.ch se fansat e rok grupit kosovar kanë ardhur gati nga e gjithë Evropa: Franca, Italia, Luksemburgu, Lihtenshtajni, Gjermania, Austria.

“Ata që e kanë humbur këtë shans, e kanë humbur, ndërsa ata që ishin këtu asnjëri prej tyre nuk është ndarë i zhgënjyer”, tha Fatmir Haziri nga „Special Events Different Show”, duke premtuar surpriza të tjera në koncertet e radhës në Cyrih.

Rok grupi Jericho vjen në Zvicër në kuadër të serive të koncerteve që po i organizon agjencia „Special Events Different Show” e Fatmir Hazirit. Pas Jerichos vjen me radhë në Cyrih Dren Abazi& Zig Zakg Orchestra. ​