Italia arrin kuotën e 1 milion personave të vaksinuar

Italia nisi fazën e dytë të vaksinimit anti-Covid dhe bëhet vendi i parë në Evropë që arrin këtë kuotë

Autoritetet italiane deklaruan së fundmi se Italia është vendi i parë në Evropë që arrin kuotën e 1 milion personave të vaksinuar, teksa ditën e diel ata nisën administrimin e dozës së dytë të vaksinës Pfizer, transmeton albinfo.ch.

Thuhet se në gjithë vendin vazhdojnë të mbeten në fuqi masat kufizuese, teksa nëntë rajone do të zgjasin orarin e aktiviteteve të bareve dhe restoranteve.

Edhe Spanja filloi të dielën fazën e dytë të vaksinimit me vaksinat Pfizer dhe Bio’n’Tech në shtëpitë e të moshuarve.

Spanja ka marrë aprovimin edhe për vaksinën Moderna, e cila ka filluar të shpërndahet në qendrat shëndetësore në gjithë vendin.

Synimi i qeverisë spanjolle është që të vaksinojë 70% të popullsisë përpara nisjes së sezonit veror.

Ditën e premte, Spanja raportoi 49 mijë raste të reja me Covid-19, një rekord infektimesh që nga nisja e pandemisë.

“Jemi shumë të lumtur që kemi arritur në këtë fazë të vaksinimit dhe jemi mirënjohës dhe shpresojmë që të vaksinohet e gjithë popullsia, pasi sigurisht ne duhet të krijojmë imunitet ndaj virusit. Autoritetet po bëjnë një punë të mirë duke vaksinuar të gjithë rezidentet në shtëpitë e të moshuarve”, tha Roza Vilanova, drejtoreshë e shtëpisë së të moshuarve.

---