Ish shefi i OSBE-së në Kosovë, udhëheq OSBE-në në Ukrainë

Tim Guldimann në karrierën e tij ka punuar si shef i misionit të OSBE-së dhe i dërguar i posaçëm i sekretarit të përgjithshëm të OKB-së në Kosovë, 2007-2008

Diplomati zviceran, i njohur veç tjerash edhe si ish ambasador i OSBE-së në Kosovë, Tim Guldimann, do të jetë i dërguar i OSBE-së për Ukrainë. Vendimin për këtë emërim e ka marrë ministri i punëve të jashtme i Zvicrës, Didier Burkhalter, në cilësinë e kryesuesit të OSBE-së për këtë vit.

Diplomati me përvojë, i cili prej sa vitesh është  ambasador i Zvicrës në Gjermani, do të udhëheqë bisedime të vazhdueshme me të gjitha palët e përfshira në konflikt si dhe me partnerët ndërkombëtarë, ka thënë Burkhalter para Këshillit të Sigurimit të OKB-së.

Burkhalter ka shpallur më tutje ngritjen e një grupi kontakti për Ukrainën, i cili do t`i qëndrojë pranë këtij vendi në fazën kalimtare.

Ministria e Jashtme në një njoftim të saj bën të ditur se Guldimann vazhdon të jetë edhe më tutje në funksionin e ambasadorit të Zvicrës në Gjermani.

Guldimann në karrierën e tij ka punuar si ambasador i Zvicrës në Iran (1999-2004), udhëheqës i misionit të OSBE-së në Kroaci (1997-1999), i misionit të OSBE-së dhe i dërguar i posaçëm i sekretarit të përgjithshëm të OKB-së në Kosovë gjatë viteve 2007-2008, thuhet veç tjerash në komunikatën e Ministrisë se Jashtme të Zvicrës.