Ish liderit opozitar i vazhdohet masa e arrestit shtëpiak

Ish-liderit të Lëvizjes Vetëvendosje, deputetit Albin Kurti i vazhdohet masa e arrestit shtëpiak deri më 17 shkurt të vitit 2016. Opozita e quan vendim politik

Keystone

Gjykata Themelore e Prishtinës ia vazhdoi të hënën (sot) masën e arrestit shtëpiak, ish liderit të Lëvizjes Vetëvendosje, deputetit Albin Kurti, deri më 17 shkurt të vitit 2016.

Po ashtu 30 ditë paraburgim i është shqiptuar edhe koordinatorit të sekretariateve të Vetëvendosjes, Nol Nushit.

Këtë vendim të Gjykatës, e konfirmoi Vetëvendosje, e cila e konsideron të paarsyeshme dhe politik vendimin.

“Ky sistem i kapur i drejtësisë, është vënë në shërbim të kësaj Qeverie kriminale, e cila përmes marrëveshjeve antikushtetuese po do ta instalojë “Zajednicën” në Kosovës. I bëjmë thirrje Qeverisë që t’i ndalë përpjekjet për ta shtypur opozitën”, thuhet në reagimin të Vetëvendosjes, partisë më të madhe opozitare.

Po ashtu kjo parti i bënë thirrje Gjykatave që të vihen në shërbim të Republikës, dhe “t’i nxjerrin para drejtësisë kriminelët e pushtetit, ata të cilët shkelën Kushtetutën, e për të cilët nuk vlen asnjë ligj në Kosovë”.

“Pushteti nuk mbahet me represion ndaj opozitës. Ne nuk ndalemi. Përpjekjet tona për ta mbrojtur Republikën e Kosovës nga marrëveshjet e dëmshme dhe nga kjo Qeveri, nuk do të ndalen. Më 9 janar, populli i Kosovës do ta thotë fjalën e vetë”, thuhet në komunikatën e LVV-së.

Ndryshe, Albin Kurti është akuzuar nga Gjykata Themelore e Prishtinës për hedhjen e gazit lotsjellës brenda Kuvendit të Kosovës. Ai së bashku me deputetët opozitarë kanë kundërshtuar marrëveshjen e Qeverisë së Kosovës me Malin e Zi për demarkacionin e vijës kufitare dhe atë me Serbinë për Asociacionin e Komunave me shumicë serbe.

Përveç Kurtit, masë ndalimi kanë edhe 12 deputetë të tjerë opozitarë. Edhe ata mbahen në paraburgim dhe arrest shtëpiak për të njëjtën arsyeje.