Ish kryetari i demokristianëve, bëhet baba nga një aferë jashtëmartesore!

“Kur në dhjetorin e kaluar, para se ta mbaroja mandatin tim si deputet në Bernë, kalova një natë me një grua, kam bërë një gabim të rëndë”, ka thënë politikani i CVP-së, Christophe Darbelley

Ish kryetari i CVP/PDC, partisë që në fokus ka vlerat tradicionale si familja, Christophe Darbelley është bërë baba për të katërtën herë, dhe ky nuk do të ishte kurrfarë lajmi. Mirëpo, fëmija i tij i katërt nuk vjen nga martesa me gruan e tij por nga një aferë e jashtme dashurie!

Vetë Darbelley e pranon publikisht këtë dhe kërkon falje për “gabimin” që ka bërë. “

“Kur në dhjetorin e kaluar, para se ta mbaroja  mandatin tim si deputet në Bernë, kalova një natë me një grua, kam bërë një gabim të rëndë”, ka thënë politikani për “SonntagsBlick”.

Bashkëshorten e vet Derbellay e ka informuar vetëm pak ditë para lindjes së fëmijës, transmeton albinfo.ch. “Edhe pse e ka m lënduar shumë rëndë dhe i kam shkaktuar dhembje të madhe, ajo ka vendosur që këtë situatë të vështirë ta tejkalojë pranë meje”, ka thënë ai, duke shtuar se e ka lutur bashkëshorten për falje.

Politikani demokristian ka vendosur të kujdeset për fëmijën e tij. “Edhe para se të lindte unë e kam pranuar zyrtarisht fëmijën dhe i kam rregulluar detyrimet që kam ndaj tij”, sqaron Darbelley.

Pas kryesimit të partisë dhe mandateve si deputet nacional, politikani i CVP-së vitin e ardhshëm do të garojë për një vend në ekzekutivin e kantonit të tij, Valisit. Ai është i vetëdijshëm se shumë miq dhe zgjedhës i ka zhgënjyer me sjelljen  e tij. “I lus që të më falin”, përsërit ai.