ISEAL promovon në Prishtinë tri botimet më të reja

Më 27 shkurt 2019, e mërkurë, 11h30-12h30, në Bibliotekën Kombëtare në Prishtinë, ISEAL promovon tri botimet e saja më të reja, shkruan albinfo.ch.

“URTËSI NGA KOSOVA” (botim në 5 gjuhë: shqip, anglisht, gjermanisht, frëngjisht dhe italisht). Libër me fjalë të urta, foto dhe 3000 punime dore enkas të bëra për këtë libër nga gra të prekura nga lufta.

“RRËNJË PËR TU RRITUR GJETIU” (botim në gjuhët shqipe dhe frënge). Konkurs letrar i organizuar nga ISEAL dhe Universiteti të Lozanës

“KOSOVA : HISTORI E PRANISHME E NJË SHTETI TË RI” (botim në gjuhët shqipe dhe frënge). Akte të Simpoziumit shkencor të mbajtur vitin e kaluar në Universitetin e Lozanës me rastin e 10 vjetorit të Pavarësisë së Kosovës

Në këtë promovim do të jenë të pranishëm edhe personalitete të ndryshme të ISEAL-it, në mesin e tyre Dr Olivier Meuwly, Dr Régis Marion-Veyron, etj.

ISEAL – Institucion shkencor, me vlerë publike, unik në Zvicër

Konfederata Zvicerane, në muajin mars 2008, duke e njohur ISEAL-in “Institucion me vlerë publike”, i mundëson që të zhvillojë aktivitete afatgjata në sektorët ekonomikë, kulturorë, letrarë dhe shkencorë.

ISEAL-i është, për sa u përket strukturave, sektorëve dhe projekteve, i pari Institucion i tillë në Zvicër.

Falë bashkëpunimit me qytetin e Lozanës, ISEAL e ka një ndërtesë të veten. 7 struktura e shoqata të ndryshme, zvicerane dhe komunitete të tjera, me vite zhvillojnë aktivitetet e tyre në lokale të ISEAL-it, falas, me përkrahjen e ISEAL-it.