Ipeshkvët e Zvicrës mbështesin armatosjen e kurdëve në Irak

Ata po ashtu kanë kërkuar nga organizatat myslimane në Zvicër të dënojnë ndjekjen e të krishterëve dhe të pakicave tjera religjioze në Siri dhe Irak

Konferenca Ipeshkvnore e Zvicrës ka apeluar për mbështetje të popullatës në Irak dhe në Siri, qoftë edhe duke furnizuar kurdët me armë. Ipeshkvët e Kishës Katolike të Zvicrës po ashtu kanë kërkuar nga organizatat myslimane që veprojnë në Zvicër të dënojnë ndjekjen aktuale të të krishterëve dhe të pakicave tjera religjioze.

Konferenca e Ipeshkëve ka kërkuar nga bashkësia ndërkombëtare që popullata e vuajtur në regjionin e konflikteve të ndihmohet qoftë me lutje, me ndihma humanitare, me pranimin e refugjatëve ose me ndërhyrje të shteteve në kuadrin e bashkësisë ndërkombëtare. Në kushtet e një dhune të tmerrshme dhe tüe ndjekjes së pakicave religjioze, në veçanti te krishterëve dhe jezidëve, ipeshkvit zviceranë mbështesin e edhe dërgimin e armëve për kurdët.

“Në të vërtetë të krishterët kanë obligim të thonë se dhuna nuk mund të mundet me dhunë. Por, kur brutaliteti është kaq i madh, sa që njerëzit mund të mbrohen vetëm përmes armëve, atëherë kjo është mundësia e fundit-Ultima Ratio”, ka thënë për radion SRF Markus Büchel, kryetar i Konferencës Ipeshkvnore të Zvicrës.

Duke kërkuar nga organizatat myslimane të Zvicrës të dënojnë dhunën ndaj pakicave religjioze, konferenca e ipeshkëve ka konstatuar se të rinjtë myslimanë të këtushëm i janë nënshtruar një radikalizmi, pjesërisht nga mosdija. Për këtë arsye përfaqësuesit më të lartë të Kishës Katolike të Zvicrës mbështesin idenë që në Fakultetin Teologjik të Freiburgut, imamëve t`u ofrohet informacion lidhur me funksionimin e shoqërisë zvicerane. Kjo, sipas konferencës në fjalë, mund të ndihmojë përpjekjet për paqe dhe siguri.

Pak ditë më parë edhe Papa Françesku ka mbështetur një ndërhyrje ndërkombëtare për të ndaluar dhunën në Irak. “Unë po e nënvizoj foljen “të ndalohet” dhe jo “të bombardohet” ose “të luftohet”, ka thënë Papa, duke iu referuar ndalimit te dhunës së islamistëve militantë. Fjalët e të parit të katolicizmit botëror paraqesin kthesë në qëndrimin e Vatikanit, i cili deri më tash ka qenë shprehimisht kundër çdo ndërhyrjeje ushtarake.