INTERPOL përfshihet në hetimin për prejardhjen e armëve të sulmit në Banjskë

Ushtruesi i detyrës i drejtorit të Policisë në Bosnjë e Hercegovinë, Vahidin Munjiq, ka njoftuar se administrata Federale e Policisë në Bosnjë e Hercegovinë është duke e verifikuar informacionin se armët e përdorura më 24 shtator në sulmin ndaj Policisë së Kosovës në Banjskë të Zveçanit janë siguruar nga Tuzla, qytet në veriperëndim të Bosnjës.

Ai u shpreh se dyshimet për transferim të armëve nga Tuzla janë duke u hetuar përmes Organizatës Ndërkombëtare të Policisë, INTERPOL dhe që Zyra e Prokurorit të Bosnjë e Hercegovinës është informuar për gjithçka, shkruan REL.

“Ne e kemi marrë informacionin dy ditë më parë, përmes mediave. Ne i kemi kërkuar INTERPOL-it që të na ofrojë informacione nga të gjitha agjencitë e tjera, si nga Zyra e Prokurorit të Serbisë. Ne ende jemi në pritje e nuk mund të flasim më shumë”, ka thënë ai, përcjell albinfo.ch.

Ndryshe, ish-nënkryetari i Listës Serbe, Milan Radoiçiq, i marrë në pyetje nga Prokuroria e Lartë Publike e Beogradit, kishte thënë se ai i ka “siguruar armët dhe pajisjet shpërthyese” nga Tuzla, prej janarit të këtij viti deri më 24 shtator.