Iniciativë kundër imazhit të Zvicrës si “ishull i çmimeve të larta”

Duhen ndërmarrë masa që konsumatorët zviceranë ashtu si dhe ndërmarrjet zvicerane të mund të përfitojnë nga ofertuesit e huaj pa u diskriminuar me këtë rast

Zvicra nuk bën të jetë “ishull i çmimeve të larta”. Një gjë të tillë e kërkon një aleancë e gjerë politike e cila lufton kundër çmimeve të stërlarta të prodhimeve të importit. Në këtë synim, aleanca në fjalë ka lancuar iniciativën “Fair-Preis-Iniciative” (Iniciativa për çmimet e arsyeshme).

Federata duhet të ndërmarrë masa që konsumatorët zviceranë ashtu si dhe ndërmarrjet zvicerane të mund të përfitojnë nga ofertuesit e huaj pa u diskriminuar me këtë rast, shkruan srf.ch.

Siç dihet, për shkak të marzhave të larta apo dhe për arsye të tjera, prodhimet që vijnë nga jashtë në tregun e Zvicrës, shiten shumë më shtrenjtë se sa në vendet përreth. Kjo bën që shumë zviceranë, për të blerë mallra  të konsumit ditor të dalin në shtetet që kufizohen me Zvcirën.

Afati për grumbullimin e nënshkrimeve për iniciativën në fjalë përfundon më 20 mars 2018.

Mbrapa kësaj iniciative qëndron fondacioni për mbrojtjen e konsumatorit, Gastrosuisse dhe Federata ekonomike e Zvicrës Swissmechanic.