Indikatori në Gjermani ka rënë për herë të parë pas disa muajsh nën 100

Në Gjermani debati rreth mungesave të vaksinave ende po vazhdon. Një studim ndërkombëtar tregon se Gjermania është në rastin më të mirë mesatarisht e suksesshme në krizën e koronavirusit.

Indikator shtatëditor i përhapjes së virusit Corona në Gjermani ka rënë për herë të parë pas disa muajsh nën 100 të infektuar në 100.000 banorë. Sipas Institutit Robert Koch (RKI) ka rënë në 98 numri i personave të infektuar në 100.000 banorë brenda shtatë ditësh. Për herë të fundit një indikator të tillë në Gjermani ka pasur më 29 tetor. Gjatë 24 orëve të fundit ka pasur 17.553 persona të infektuar.

Indikatori i shtatë ditëve të fundit është pika kryesore e referimit për qeverinë federale dhe qeveritë e landeve, për vendosjen apo zbutjen e kufizimeve. Qeveria gjermane synon që indikatori të ulet nën 50 në 100.000 banorë në shtatë ditët e fundit. Për herë të fundit Gjermania ka pasur një indikator të tillë më 20 tetor të vitit të kaluar. Më pas shifrat e infektimeve janë rritur dukshëm, ndërsa shifra më e lartë ka qenë 197.6 më 22 dhjetor.

Numri i përgjithshëm i infektimeve në Gjermani ka arritur, sipas Institutit Robert-Koch, në 2.178.828, ndërsa nga Corona apo sëmundjet që kanë lidhje me Coronën kanë vdekur deri të mërkurën (28.01) 54.913 vetë.

Samit për vaksinimin

Ministri federal i Shëndetësisë, Jens Spahn, kërkon durim në debatin për vaksinimin. “Ne do të kalojmë të paktën dhjetë javë të vështira me mungesën e vaksinës”, shkruan Spahn në Twitter. Ai këtu i referohet furnizimit jo të rregullt nga kompanitë BioNTech / Pfizer, Moderna dhe AstraZeneca. Spahn është i hapur për një samit për vaksinimin, të kërkuar nga politikanët e SPD, ku do të ishin edhe përfaqësuesit e landeve dhe prodhuesve farmaceutikë.

Shumë politikanë socialdemokratë – përfshirë këtu edhe kryeministren e landit Rhineland-Pfalz, Malu Dreyer, krerët e qeverisë së Berlinit dhe Brandenburgut, Michael Müller dhe Dietmar Woidke – kanë kërkuar mbajtjen e një samiti për vaksinimin.

 

Besohet se vaksina e koncerneve BioNTech dhe Pfizer është efektive edhe kundër variantit të virusit të ri, të shfaqur në Afrikën e Jugut. Një studim laboratorik nga Pfizer dhe shkencëtarët e Universitetit të Teksasit tregon se vaksina ka humbur shumë pak efektshmëri ndaj virusit të ri.

Duhet të mbyllen kufijtë

Shumica e gjermanëve mendojnë, se në kohën e krizës së Coronës duhet të mbyllen kufijtë edhe brenda Bashkimit Evropian. Në një sondazh të televizionit ZDF thuhet se 57 për qind e gjermanëve mendojnë se kufijtë duhet të mbyllen, 40 për qind janë kundër. 59 për qind e të anketuarve mendojnë se mbylljet e shkollave janë të drejta, ndërsa kundër janë 35 për qind. Në përgjithësi, vetëm 14 për qind i konsiderojnë masat e tanishme kufizuese si të ekzagjeruara, 56 i konsiderojnë ato si të duhura – ndërsa 28 për qind bëjnë thirrje për shtrëngim edhe më të madh të masave.

Gjermania në menaxhimin e krizës së Coronës nuk është ndër vendet e para. Një studim nga Instituti Lowy në Sidnei të Australisë tregon, se Gjermania zë vendin e 55-të nga 98 vende sa janë përfshirë në këtë studim. Në studim thuhet se më e mira në menaxhimin e krizës së Coronës është Zelanda e Re, ndërsa në vendin e fundit është Brazili. Renditja është bërë mbi bazën e gjashtë kritereve – duke përfshirë këtu edhe numrin e infektimeve, numrin e të vdekurve dhe testet.

Përveç Zelandës së Re, në dhjetëshen më të mirë janë edhe Vietnami, Tajvani, Tajlanda, Qiproja, Ruanda, Islanda, Australia, Letonia dhe Sri Lanka. Zelanda e Re e ka mbajtur nën kontroll përhapjen e virusit përmes mbylljes së kufijve të jashtëm, bllokimit të menjëhershëm dhe testeve të shpeshta të Coronës. Ndër vendet me suksesin më të vogël në këtë pandemi janë (përveç Brazilit) edhe Meksika (vendi i 97-të), Kolumbia (96-të), Irani (95) dhe SHBA (94).

Kina në të cilën është shfaqur për herë të parë virusi Corona nuk është përfshrië në studimin e Institutit Lowy. Studiuesit thonë se ata nuk kanë pasur të dhëna të mjaftueshme për të bërë studim të mirë në këtë vend.

---