Hoti thotë se Qeveria po i diskriminon bujqit

Sipas shefit të Grupit Parlamentar të LDK-së, Avdullah Hotit, Qeveria e Kosovës nuk po përkrah bujqit, po i diskriminon ata.

Shefi i Grupit Parlamentar të LDK-së, Avdullah Hoti ka kritikuar qeverinë për diskriminim të bujqve .

Ai ka ngritur një paralele në mes të mjeteve të ndara për bujqit në veri si dhe për bujqit në komunat e tjera të Kosovës.

“Derisa bujqve në katër komunat në veri, që janë kryesisht të komunitetit serb, shteti përmes granteve ju mbulon 90% të investimit në bujqësi, për bujqit në komunat e tjera në gjithë Kosovën mbulimi i investimeve është vetëm 50%. Plani për Bujqësi dhe Zhvillim Rural 2014-2020 nuk parasheh ndarje të veçantë të granteve investive për zona të caktuara. Masat për mbështetje të bujqve aplikohen në tërë territorin e Kosovës, varësisht prej kulturave bujqësore”, ka shkruar Hoti.

Ai ka thënë se përkundër që Agjencia Kundër Korrupcionit e ka anuluar thirrjen për aplikim për grante të Ministrisë së Bujqësisë me arsyetimin se ajo ka përmbajtje diskriminuese, Ministri i Bujqësisë ka vazhduar me nxjerrjen e Udhëzimit Administrativ 09/2018, ku e ka përligjur diskriminimin. “Diskriminimi është edhe më i thellë”, ka thënë ai.