Hoti thotë se nuk është vendosur nëse do të lejohen dasmat dhe ahengjet

Qeveria e Kosovës ende nuk ka vendosur për një gjë të tillë.

Kryeministri i Kosovës, Avdullah Hoti, ka njoftuar se Qeveria e Kosovës ende nuk ka marrë ndonjë vendim nëse do të lejohen ose jo mbajta e ahengjeve dhe dasmave, përcjell albinfo.ch.

Ai gjithashtu ka treguar se përfaqësues të estradës dhe hotelerisë do të takohen me ministrin e Shëndetësisë për të diskutuar nëse ekzistojnë kushtet e duhura për t’u lejuar mbajtja e tyre.

Deklarata e plotë e Hotit:

“Qeveria e Kosovës ende nuk ka vendosur për lejimin e dasmave dhe ahengjeve. Më datën 1 korrik përfaqësuesit e estradës dhe hotelerisë do të takohen me ministrin e Shëndetësisë për të vlerësuar nëse ka kushte që të zhvillohen aktivitete të tilla.

Të gjitha masat lehtësuese që janë ndërmarrë deri më tani, janë duke u monitoruar nga afër dhe po vlerësohen vazhdimisht nga Instituti Kombëtar i Shëndetësisë Publike dhe Ministria e Shëndetësisë.

Prandaj, kërkohet nga qytetarët që të tregojnë kujdes dhe t’i respektojnë masat. Në të kundërtën, në rast të përkeqësimit të situatës, prioritet mbetet jeta e qytetarit dhe do të fillojmë me aplikim të masave të reja për mbrojtje nga përhapja e virusit”, ka përfunduar Hoti./albinfo.ch

---