Homazhe në Prekaz e tek varri i Rugovës

Ministri i FSK-së Rrustem Berisha dhe komandanti i FSK-së gjenerallejtënant Rrahman Rama, kanë vlerësuar lartë sakrificën e familjes Jashari

Me rastin e 10-vjetorit të shpalljes së pavarësisë së Kosovës drejtues të institucioneve dhe partive politike kanë bërë homazhe tek kompleksi Memorial “Adem Jashari”, në Prekaz dhe tek varri i presidentit Ibrahim Rugova.

Ministri i FSK-së Rrustem Berisha dhe komandanti i FSK-së gjenerallejtënant Rrahman Rama, kanë vlerësuar lartë sakrificën e familjes Jashari.

“Ishim këtu për të nderuar veprën e lavdishme të komandantit legjendar të UÇK-së Adem Jashari dhe sakrificën e madhe të  familjes Jashari, si dhe për të nderuar të gjithë dëshmorët tjerë që kanë dhanë jetën për të gëzuar lirinë dhe për të  festuar  sot ketë ditë që e kemi,  për të festuar 10 vjetorin pavarësisë”, tha ministri Rrustem Berisha.

Ndërsa anëtarë të Kryesisë të LDK-së, nderuan jetën dhe veprën e Presidentit Rugova. Sekretari i Përgjithshëm i LDK-së, Ismet Beqiri tha se figura e Presidentit Rugova, simbolizohet dhe është sinonimi i Pavarësisë që sot ne e gëzojmë këtë ditë.

“LDK-ja sikurse Presidenti Rugova mbeten shtylla më e fortë e Kosovës, LDK mbetet partia e cila ka qëndrimin, stabilitetin dhe përkushtimin e ruajtjes dhe ndërtimit të shtetit të Kosovës”, tha Beqiri.