Hollande në Cyrih dhe në Lozanë në ditën e dytë të vizitës

Në ditën e dytë të vizitës së tij në Zvicër, presidenti francez François Hollande së bashku me mikpritësen e tij, presidenten zvicerane SImonetta Sommaruga ka vizituar komunën Heddingen në kantonin e Cyrihut. Aty msafiri i lartë është pritur nga drejtori për ekonomi i kantonit të Cyrihut, Ernst Stocker dhe përfaqësuesit e firmës Ernst Schweizer AG.

Më tutje, Hollande ka vizituar edhe një firmë të përpunimit të metaleve, e cila angazhohet në sektorin e energjisë alternative, me ç`rast është informuar në lidhje me procesin e punës.

Ajo që e ka interesuar më shumë mysafirin e lartë nga Franca ka qenë modeli zviceran i arsimit profesional dual. Ai është takuar me nxënësit që ndjekin zanatin dhe është fotografuar me ta.

Kompania Ernst Schweizer punëson 600 punëtorë, në mesin e të cilëve edhe 46 nxënës të zanatit.

Pas Hedingenit, Hollande ka vazhduar vizitën në qytetin e Cyrihut. Së bashku me kryebashkiaken, Corine Mauch ai ka vizituar Shkollën e Lartë të Arteve. Më vonë Hollande dhe Sommaruga me delegacionet kanë vazhduar me tren rrugën për në Lozanë.

Në kryeqytetin e Kantonit Vaud ai është pritur nga kryetari i Qeverisë Pierre-Yves Maillard. Pastaj së bashku i bëhet një vizitë Universitetit Teknik të Lozanës (EPFL).

Vizita e presidentit francez përmbyllet me qëndrimin e tij pasditen e sotme në Lausanne-Ouch.