Hiqet barrikada në Merdar

Njoftohen mërgimtarët tanë se pikë kalimi kufitar në Merdar është liruar për qarkullim dhe është kthyer në normalitet të plotë.

Mëngjesin e sotëm barrikada, e cila ndodhej dy kilometra larg pikës kufitare në Merdar, në territorin e Serbisë, është hequr, përcjell albinfo.ch.

Më 27 dhjetor pika kufitare në Merdar u mbyll nga Policia e Kosovës, pasi një grup serbësh në Serbi kishin bllokuar rrugën për në kufi.

Për të enjten është paralajmëruar edhe largimi i barrikadave nga rrugët e pjesës veriore të Kosovës.

Lajmi për largimin e barrikadave u bë i ditur mbrëmjen e 28 dhjetorit, pasi presidenti i Serbisë, Aleksandar Vuçiç, takoi përfaqësuesit e serbëve të Kosovës.

Largimi i barrikadave ishte kushtëzuar me lirimin nga paraburgimi të ish-policit të Kosovës, Dejan Pantiç, i cili u arrestua për dyshimet se kishte organizuar sulmin e kryer ndaj zyrave të Komisionit Qendror të Kosovës në pjesën veriore në fillim të muajit dhjetor.

Pantiç u lirua dje nga paraburgimi pasi iu zëvendësua masa me atë të arrestit shtëpiak.

Në një protestë që u zhvillua në fshatin Rudar të Zveçanit, përfaqësuesit politikë të serbëve të Kosovës vendosën edhe kushte të tjera për heqjen e barrikadave, përfshirë formimin e Asociacionit të komunave me shumicë serbe.

Po ashtu edhe Qendra Kombëtare për Menaxhim Kufitar ka shkruar se pasi që janë larguar barikadat e vendosura më 27.12.2022, në kilometrin e dytë nga pikë kalimi kufitar  Merdar në brendësi të territorit të Republikës së Serbisë, njoftojmë qytetarët dhe bashkatdhetarët tanë se pikë kalimi kufitar në Merdar është liruar për qarkullim i është kthyer normalitetit të plotë.

 

---