Haradinaj pret në zyrë nënën dhe motrat

Kryeministri ka njoftuar në rrjetet sociale se ka pritur në zyrë nënën e tij, motrat dhe kunatën

Kryeministri i Kosovës, Ramush Haradinaj, sot ka pasur një takim jo të zakonshëm në zyrën e tij.

Ai ka njoftuar në rrjetet sociale se ka pritur në zyrë nënën e tij, motrat dhe kunatën.

“Secili takim me nënën na i freskon kujtimet e fëmijërisë dhe të rritës, na i kujton vuajtjet por edhe ëndrrat dhe gëzimet familjare. Sot më zbukuruan ditën me vizitën e tyre nana ime, Ruka, dhe motrat Mema e Antigona, si dhe kunata Suzana, që erdhën nga Gllogjani për t’më uruar për përgjegjësitë që kam marrë për ta drejtuar Qeverinë e vendit”, ka shkruar Haradinaj. “I jam mirënjohës nanës dhe i përkulem, jo vetëm që më ka sjellë në këtë botë, por mbi të gjitha si nanë e dashur dhe durimtare e dhjetë fëmijëve”.

Haradinaj ka thënë se dashuria për nënën e inkurajon të jetë në shërbim të qytetarëve të Kosovës dhe t’i ndalë në ndihmë të gjithëve që kanë halle.

“Duart e nanës janë vet metafora e jetës, ato na kanë ushqy, përkëdhelë e vënë në gjumë, ato duar na kanë dhënë ngrohtësi, na kanë ngritur lartë, deri në nivele më siperane të jetës! Prandaj, dashuria individuale për nanën është njëherësh edhe universale dhe më inkurajon që gjithnjë të jem në shërbim të të gjithë njerëzve të Kosovës, pa dallim, i dashur dhe i kujdesshëm për me i dalë në ndihmë secilit njeri që ka halle”, ka shkruar në fund të postimit ai.