Haradinaj nuk tërhiqet: Pa njohje, nuk ka heqje të taksës

Kryeministri i Kosovës, Ramush Haradinaj, i ka quajtur ‘të përziera’ të gjeturat e raportit të progresit për vendin tonë, ndërkohë që edhe një herë e bëri të qartë se heqja e taksës ndaj Serbisë do të bëhet vetëm atëherë kur të ketë një marrëveshje gjithëpërfshirëse për njohje reciproke Kosovës-Serbi, raporton KosovaPress.

Pas takimit me shefen e Zyrës së BE-së në Kosovë, Nataliya Apostolova, nga e cila mori raportin e progresit për Kosovën, kreu i Qeverisës ë vendit e quajti këtë dokument si një pasqyrim ‘të përzier’ i të gjeturave mbi ngecjet dhe përparimin e bërë brenda një viti, përcjell albinfo.ch.

Ndërsa, Apostolova në fjalën e saj tha se raporti i progresit rikonfirmon perspektivën evropiane të gjashtë partnerëve të Ballkanit Perëndimor, përfshirë edhe Kosovën, njëherësh tregon problemet në rajon, i cili një ditë pritet të jetë pjesë e BE-së.

I pyetur rreth heqjes eventuale të taksës ndaj produkteve serbe, Haradinaj këmbënguli edhe një herë në njohjen e Kosovës nga Serbia.

Sa i përket numrit të zëvendësministrave aktualë, e cila përmendet në raportin e progresit, Haradinaj tha se kjo është diskutuar në ligjin për qeverinë, i cili do ta zgjidhë këtë problem për të gjitha qeveritë e ardhshme.