Haradinaj e quan destabilizuese fushatën e Serbisë për FSK-në

Kryeministri i Kosovës, Ramush Haradinaj, ka kërkuar përkrahje nga deputetët për fazën e fundit të bërjes së ushtrisë, që ka thënë se është në përputhje të plotë me Kushtetutën e Kosovës, shkruan albinfo.ch

“Për formimin e ushtrisë kemi bërë biseda intensive me të gjitha palët. Kosova asnjëherë nuk do ta rrezikojë aleancën me NATO-n. Është rrenë e tyre qysh dinë të bëjnë, do të marrim veprime sqaruese për serbët dhe unë do të shkoj në tërë vendin për të folur me ta dhe për t’iu treguar se narrativi që iu jepet nga Serbia për ushtrinë e Kosovës është i qëllimshëm”, ka thënë Haradinaj.

Ai, gjithashtu, ka kërkuar vazhdim të përkrahjes për taksën, për të cilën ka thënë se nuk tërhiqet. “Ju lutem, duhet të kemi kujdes, sepse do të inskenohet ndonjë rast që të ketë ndonjë vdekje natyrale në ndonjë spital dhe serbët do të thonë ‘shihni se kjo ndodhi shkaku i taksës dhe pamundësisë që të futen barna e gjëra të tjera në vend’, pra ne mund të presim edhe situata të tilla, por ju lus përkraheni narrativin e vendit tuaj”, ka deklaruar Haradinaj.