Hap dyert pika e re shkollore në Arbon të Kantonit të Thurgaut 

Që nga dita e parë, nxënësve iu shpërndanë librat shkollorë, dhuratë nga Ministritë e Arsimit, të R. së Shqipërisë dhe asaj të Kosovës

Pas shkollave shqipe në Romanshorn, në Weinfelden, në Erlen, në Frauenfeld dhe në Amrsiwil, Kantonit të Thurgaut i shtohet edhe pika shkollore në Arbon, e cila këto ditë hapi dyert për mësimin e gjuhës shqipe. Kjo u arrit falë angazhimit të veprimtarëve të shkollës shqipe: Nexhat Hysenit dhe Vaxhid Sejdiut, të cilët pas një angazhimi disa javor së bashku me prindërit e qytetit Arbon arritën që hapjen e kësaj pike shkollore ta bëjnë realitet.

Gëzimi për hapjen e pikës shkollore shihet së pari në fytyrat e nxënësve, të cilët çdo të shtune vijojnë mësimet në gjuhën amtare dhe në fytyrën e mësueses Artjola Ferizit, e cila me aq përkushtim ka marrë detyrën si mësuese  e gjuhës shqipe në këtë pikë shkollore.

Mësimi zhvillohet çdo të shtune në shkollën fillore në Arbon nga ora 09:30 -11:15

Nxënësit  e shkollës shqipe në Arbon: Ajana, Lea, Justini, Anisi, Zejdi, Besiana, Ajani, Siari, Alhambra dhe Arta shpresojnë që në javët bë vazhdim atyre do t`iu bashkëngjiten edhe shoqet dhe shokët e tyre shqiptarë të cilët në orët e para nuk arritën të jenë me ta.

Duhet përmendur se që nga dita e parë nxënësve iu shpërndanë librat shkollorë, dhuratë nga Ministritë e Arsimit, të R. së Shqipërisë dhe asaj të Kosovës. Lidhur me këtë, shkolla shqipe  falënderon të gjitha institucionet që ndihmuan: Qendrën e Botimeve për Diasporën dhe Ministritë e Arsimit të R. së Shqipërisë dhe të Kosovës, Ministritë  e Jashtme të R. së Shqipërisë dhe të Kosovës, Ambasadën e R. së Shqipërisë dhe të R. së Kosovës për dërgimin dhe shpërndarjen e teksteve shkollore.

Mësuesja, gjatë një ore mësimore me nxënësit e shkollës shqipe në Arbon

“Duhet të veprojmë dhe të punojmë në shërbim  të gjuhës shqipe, me qëllim që në bankat shkollore të përfshijmë sa më shumë fëmijë, me qëllim që edhe gjeneratat  e reja ta mësojnë dhe ta ruajnë gjuhën amtare”, thuhet veç tjerash në njoftimin e bërë nga Sektori për informim.

 

 

---