Greqi: Më shumë se një mijë trupa të paidentifikuar të refugjatëve

Gjatë tetë muajve të parë të vitit 2016 rojat bregdetare kanë gjetur 142 refugjatë të vdekur në 51 operacione të shpëtimit dhe në dy incidente ka pasur 27 të humbur

Në Greqi ka më shumë se 1.000 trupa të paidentifikuar të refugjatëve dhe emigrantëve që arritën në vend në 20 vjetët e fundit, sipas të dhënave të paraqitura në Athinë nga policia greke, rojat bregdetare dhe Komiteti Ndërkombëtar i Kryqit të Kuq (KNKK).

Siç njoftojnë mediat në Athinë, të dhënat janë publikuar në kuadër të ngjarjes që ishte titulluar “Praktikat më të mira për identifikimin e mbetjeve mortore të paidentifikuara, me theks të veçantë në menaxhimin e të dhënave”, që ishte organizuar nga policia greke dhe Komitetit Ndërkombëtar të Kryqit të Kuq (KNKK).

Mungesa e një baze të dhënash të plota të personave të vdekur, fluksi i madh i refugjatëve në mënyrë të konsiderueshme ka penguar shërbimet mjekësisë ligjore në vend për shkak të burimeve të kufizuara njerëzore dhe pajisjeve logjistike.

Sipas të dhënave të paraqitura nga përfaqësuesi i rojës bregdetare, Vlasios Kariotis, gjatë tetë muajve të parë të vitit 2016 rojat bregdetare kanë gjetur 142 refugjatë të vdekur në 51 operacione të shpëtimit dhe në dy incidente ka pasur 27 të humbur.

Në vitin 2015 rojat bregdetare kanë tërhequr 272 trupa nga deti në 77 operacionet e shpëtimit, dhe kanë regjistruar një total prej 152 personave të zhdukur në 21 incidente. Në përgjithësi, rojat bregdetare shpëtuan 103 372 refugjatë dhe emigrantë në vitin 2015 dhe 54.315 në tetë muajt e parë të vitit.

Zyra greke e KNKK-së tha se ka 817 aplikime aktive për kërkim të refugjatëve dhe migrantëve që datojnë nga fundi i vitit 2014, që korrespondon me rreth 900 njerëz.

Policia greke tha se aktualisht në regjistrin e saj të ADN-së ka më shumë se 650 lloje gjenetike të mbetjeve, të cilat nuk janë identifikuar. Në të njëjtën kohë, më shumë se 150 të afërm të personave të zhdukur janë në kërkim të anëtarëve të familjeve të tyre.