Gratë thonë se burrat e tyre janë paguar në baza mujore në Siri

Është mbajtur seanca dëgjimore për 19 gra të kthyera nga Siria, të cilat hetohen për pjesëmarrje në grupe terroriste. Atyre u është caktuar arrest shtëpiak për 1 muaj, me kërkesë të Prokurorisë.

Në seancë disa prej tyre kanë pranuar se burrat e tyre janë paguar në baza mujore gjatë qëndrimit në Siri.

Derisa një tjetër për shkak të kushteve të rënda dhe vrasjes së bashkëshortit ishte detyruar të martohej dhe dy herë të tjera, përcjell albinfo.ch.

19 gratë që janë dëgjuar në seanca të ndryshme gjatë së mërkurës, dyshohen për pjesëmarrje në grupe terroriste dhe bashkim në ushtri apo polici të huaj.

Një ditë më parë Gjykata Themelore në Prishtinë u caktoi masën e arrestit shtëpiak edhe 11 grave të tjera të kthyera nga Siria.

Aksioni për kthimin e kosovarëve nga lufta e Sirisë u realizua gjatë javës së kaluar. Gjatë këtij aksioni u kthyen 110 kosovarë, në mesin e tyre 74 fëmijë.