Gratë, në pension me 65 vjet!

Në kuadrin e konsultimeve mbi reformimin e çështjes së pensionimit të moshës “Altersreform 2020”, Dhoma e Kantoneve e Palamentit të Zvicrës ka marrë vendimet bazë. Në mesin e tyre, kryesori është ai që e ngre në 65 vjet moshën për pensionim të grave.

Kjo dhomë parlamentare ka miratuar me këtë rast kërkesat e bëra nga Këshilli Federal (qeveria) edhe lidhur me shtyrjen dhe shkurtimin e moshës për pension.

Ngritja e moshës së pensionimit të grave nga 64 në 65 vjet ka qenë “e pashmangshme” në dritën e rritjes së numrit të njerëzve që jetojnë më gjatë pas pensionimit. Kjo domethënë se jetëgjatësisë së tyre të rritur, zviceranët duhet t`ia paguajnë “tagrin” duke zgjatur edhe stazhin e punës.

Organizatat e grave dhe një pjesë e të majtës vazhdojnë ta kundërshtojnë shtyrjen e moshës për pensionim të grave duke shtruar si argumente diskriminimin që gratë kanë në paga etj.

Dhoma e Kantoneve po ashtu ka vendosur që norma minimale e konvertimit te fondet pensionale të zbritet nga 6.8% në 6%. Kjo zbritje, në praktikë përkthehet kështu: Ai që në konton e tij të pensionit ka 100.000 franga, në vend se 6800 franga e merr një pemsion vjetor prej vetëm 6000 frangash.