Grabitje si në filma, vidhen 3.8 milionë euro

Pesë persona të armatosur, kanë improvizuar një aksident me një xhip në afërsi të Tiranës, duke detyruar mjetin e blinduar të ndalojë. Më pas kanë vjedhur 3.8 milionë euro

Një grabitje sensacionale, sikurse në filmat e “Hollivoodit”, ka ndodhur dje në Shqipëri, ku një grup i armatosur ka grabitur rreth 3.8 milionë euro, nga një mjet i blinduar, i cili po lëvizte nën përcjelljen e Policisë. Pas këtij aksioni, Prokuroria Shqiptare po i merr në pyetje 6 policët që ishin pjesë e eskortës.

Sipas mediave shqiptare, që i referohen Prokurorisë në Tiranë, grabitja ka ndodhur në autostradë, nga Tirana në drejtim të Aeroportit të Rinasit. Policia ishte duke e shoqëruar automjetin e blinduar që po transportonte para nga që destinacion e kishin Austrinë.

Grupi i hetimit pohon se pesë persona të paidentifikuar ende, pranë rrugës së Kasharit, kanë tentuar të improvizojnë një aksident me një mjet tip fuoristradë (xhip), duke detyruar mjetet e blinduara që të ndalojnë, raporton TCH. Mjetet e blinduara ishin duke transportuar shumën prej 3.8 milionë eurosh.

Në deklaratat e policëve privat, Agron Sharra, Agron Lloha, Artan Mane, Eduart Metollari, Niko Prifti dhe Alban Sharra shpjegohet se grabitësit e armatosur kanë thyer xhamat e mjetit të blinduar, duke i zbritur më pas ata në tokë.

Sipas rrëfimit të policëve tashmë të arrestuar, grabitësit kanë marrë shumën e konsiderueshme dhe janë larguar me mjetin e tyre, i cili u gjet i djegur. Por, prokurorët i shohin të dyshimta këto deklarata e për këtë arsye grupi i hetimit po kryen edhe verifikime të tjera shtesë.

Ndryshe, në Shqipëri vjedhjet të ashtuquajtura spektakolare ka pasur edhe më parë, duke u vjedhur paratë që transportoheshin, por edhe bankat. Ndërsa një vjedhje interesante ka ndodhur gjatë dimrit të kaluar, kur disa hajna të maskuar si babagjysh, kanë vjedhur një sasi parash në një qendër tregtare.