GLPS: Korrigjimi i territoreve vë në pikëpyetje shtetësinë e Kosovës

Autori i publikimit të studimit "Kush po e përcakton agjendën e bisedimeve", ka folur në lidhje me korrigjimin e territoreve dhe shtetësinë e Kosovës.

“Korrigjimi i territoreve mund të vërë në pikëpyetje shtetësinë  Kosovës”, me këtë përfundim ka dalë Grupi për Studime Juridike dhe Politike që ka publikuar studimin për temën “Kush po e përcakton agjendën e bisedimeve”.

Përparim Kryeziu, autor i studimit, tha se Kosova nuk guxon që në asnjë rrethanë të pranojë çfarëdo lloj forme të njohjes, pos njohjes formale nga Serbia.

“Raporti konstaton se shkëmbimi apo korrigjimi i territoreve kushtëzon shtetësinë e Kosovës. Shkëmbimi i këtyre territoreve i jep Serbisë fjalën e fundit. E ardhmja e Kosovës kushtëzohet nga vendimi i Serbisë për ta njohur apo jo Kosovën”, ka thënë ai.

Kryeziu ka numëruar edhe disa arsye të tjera që, sipas tij, e bëjnë idenë e korrigjimit dhe shkëmbimit të territoreve të dëmshme, të gabuar si dhe që nuk përkon me interesat nacionale të Kosovës.

Ai ka deklaruar se Kosova ka gabuar që është futur në dialog me Serbinë pa kushte, shkruan Albinfo.ch.