I vërtetohet dënimi shqiptarit: 8 vjet e gjysmë burg për tentimvrasje të gruas

Sipas tij gruaja i kishte thënë se e kishte në dorë jetën e tij dhe se mund ta tradhtonte, gënjente, t`i bënte çka të donte ndërsa ky nuk kishte asnjë të drejtë në Zvicër

Tetë vjet e gjysmë burg. Ky ka qenë verdikti i Gjykatës së Lartë të Kantonit Aargau për shqiptarin e Kosovës që kishte tentuar të vriste të shoqen. Personi atëbotë 23 vjeçar kishte goditur bashkëshorten e tij disa herë me thikë gruan e tij duke i shkaktuar asaj plagë të rënda, shkruan aargauerzeitung.ch. Akti kishte ndodhur më 27 janar 2014.

Shqiptari ishte martuar pak kohë më parë me gruan e tij po ashtu shqiptare nga Kosova, te e cila kishte ardhur për të krijuar familje, pas martesës.

Me një thikë me teh të gjatë 15 centimetra, ai e kishte goditur gruan e tij disa herë në fytyrë, qafë  dhe kudo tjetër në mënyrë të pakontrolluar: në kokë, krahë, këmbë etj. Pas një kohe të shkurtër ai e braktis viktimën dhe ikën nga vendi i krimit, transmeton albinfo.ch.  Vetëm më vonë 23 vjeçari është kapur në Hungari dhe është ekstraduar në Zvicër.

Gjykata e Qarkut në Bremgarten e kishte dënuar atë me 6 vjet burg për veprën penale tentim vrasjeje. Sipas trupit gjykues, ai kishte vepruar nga një pozicion i arsyetueshëm, i shkaktuar nga një trazim shpirtëror, ose në afekt.

Por, për Gjykatën e Lartë të Kantonit Aargau çështja paraqitet ndryshe. Ajo e ka shpallur kosovarin fajtor për tentim vrasjeje me paramendim. Dhe, për këtë krim atij i është shqiptuar dënimi prej 8 vitesh burg.

I dënuari pastaj ka shfrytëzuar të drejtën për ankesë në shkallën më të lartë të gjyqësisë së Zvicrës, në Gjykatën Federale, në Lozanë. Ai kishte thënë se aktin e ka kryer në gjendje afekti, përcjell albinfo.ch. Sipas tij, dhjetë minuta para aktit, gruaja i kishte thënë se e kishte në dorë jetën e tij dhe nuk ia kishte dhënë çelësin e valixhes.

Ajo i kishte thënë se mund ta tradhtonte, gënjente, t`i bënte çka të donte ndërsa ky nuk mund t`i bënte asgjë, nuk kishte asnjë të drejtë në Zvicër. Nga e gjithë kjo, ai ishte ndjerë së tepërmi i fyer dhe i lënduar.

Por kjo gjykatë ka refuzuar ankesën e tij dhe i ka dhënë të drejtë Gjykatës së Lartë të Kantonit Aargau. Sipas gjykatës në Lozanë, zemërimi i tij nuk e arsyeton në asnjë rrethanë sulmin e bërë me thikë dhe rrezikimin e jetës së gruas.