Gjermania planifikon kontrolle afatshkurtra kufitare me Poloninë dhe Çekinë

pixabay

Ministrja e Punëve të Brendshme e Gjermanisë, Nancy Faeser, po planifikon mundësinë e kontrolleve kufitare afatshkurtra në pikat kufitare me Poloninë dhe Çekinë.

“Masa përkatëse shtesë të kontrolleve policore janë aktualisht duke u verifikuar”, ka konfirmuar një zëdhënës i Ministrisë së Punëve të Brendshme të Gjermanisë për agjencinë gjermane të lajmeve dpa, shkruan DW.

Faeser ishte treguar e hapur për masa të tilla.

“Sipas mendimit tim, është një mundësi për të luftuar më shumë kriminalitetin e kontrabandën”, ishte shprehur ajo.

Ndër të tjera, ajo u shpreh se kontrollet shtesë duhet të bashkëveprojnë me mbikëqyrjen e të gjithë zonës kufitare, ndërsa, sipas saj, për këtë arsye është forcuar prezenca e policisë federale në kufijtë polakë dhe çekë.

Ajo deklaroi se nuk duhet të presin se nuk do të vijnë më azilkërkues, sepse nëse një person kërkon azil në kufi, duhet që kërkesa të procedohet në Gjermani, përcjell albinfo.ch.

Kreu i grupit të CSU, Alexander Dobrindt, e akuzoi qeverinë se po bllokon masat që duhen marrë kundër shifrave në rritje të refugjatëve, si kontrollet kufitare dhe kategorizimin e Gjeorgjisë dhe Moldavisë vende të sigurta në origjinë.