Gjermania heq 40 vende nga lista “e rrezikut të lartë”, mes tyre edhe Shqipërinë dhe Kosovën

Kështu, do të bëhet më e lehtë për udhëtarët që vijnë nga vende që nuk klasifikohen më si zona me rrezik të lartë të kthehen në Gjermani

Qeveria federale e Gjermanisë ka vendosur të heqë pothuajse 40 vende nga lista e zonave me rrezik të lartë të koronavirusit, duke filluar nga e diela (27 shkurt).

Kështu ka bërë të ditur Instituti Robert Koch (RKI), sipas të cilit do të bëhet më e lehtë për udhëtarët që vijnë nga vende që nuk klasifikohen më si zona me rrezik të lartë të kthehen në Gjermani, transmeton albinfo.ch.

Asnjë vend nuk është klasifikuar rishtazi si zonë me rrezik të lartë, raporton dpa.de. Ndërsa vendet e caktuara të BE-së të hequra nga lista me rrezik të lartë janë: Belgjika, Bullgaria, Italia, Kroacia, Luksemburgu, Polonia, Suedia, Hungaria.

Vendet e mëposhtme janë hequr gjithashtu nga lista e rrezikut: Shqipëria, Antigua dhe Barbuda, Argjentina, Australia, Bangladeshi, Belize, Bolivia, Bosnja dhe Hercegovina, Ekuadori, Grenada, Guajana, Iraku, Kolumbia, Kosova, Madagaskari, Mali i Zi, Maqedonia e Veriut, Panamaja, Peruja, Filipinet, Moldavia, Shën Lucia, San Marino, Serbia, Seychelles, Surinami dhe Ukraina.

Klasifikimi si zonë me rrezik të lartë nënkupton paralajmërimin në rast udhëtimi nga Zyra Federale e Jashtme për udhëtime turistike që nuk janë të dosmosdoshme, përcjell albinfo.ch. Ky klasifikim po ashtu e bën më të lehtë për turistët anulimin e udhëtimeve që tashmë janë rezervuar pa pagesë, por nuk nënkupton patjetër ndalim udhëtimi.

---