Gjermania forcon mbështetjen për Shqipërinë në shumë fusha

Foto: Ambasada e Shqiperise ne Gjermani

Kapitulli 27 i negociatave të integrimit në Bashkimin Evropian, që përfshin menaxhimin e mbetjeve, trajtimin e ujërave të ndotura, energjinë dhe mbrojtjen e klimës, kërkon investime të mëdha infrastrukturore dhe përgatitje të administratës shqiptare për zbatimin e ligjeve evropiane. Në këtë proces, Gjermania është një nga partnerët më të rëndësishëm, me projekte të financuara nga Banka gjermane për Zhvillim (KfW) dhe agjencia për bashkëpunim GIZ, në koordinim me Bashkimin Evropian, shkruan DW, transmeton albinfo.ch.

Rreth 70% e mbështetjes financiare nga Gjermania fokusohet në sektorin energjetik, ndërsa 30% janë të dedikuara për zhvillimin urban të qëndrueshëm, përfshirë trajtimin dhe riciklimin e mbetjeve si dhe përmirësimin e infrastrukturës mjedisore në nivel lokal.

Ambasadori gjerman në Tiranë, Karl Bergner, thekson se zhvillimi ekonomik dhe mbrojtja e natyrës duhet të ecin paralelisht dhe përmes një dialogu gjithëpërfshirës, duke përfshirë edhe procesin e integrimit në BE. Ai shtoi se këto janë kërkesa thelbësore për shumë kapituj të negociatave.

Një nga investimet kryesore është landfilli i ri në Sherishtë, pranë Vlorës, i cili u vënë në funksion me një kosto prej 25 milionë euro, ku 12 milionë janë kredi nga KfW dhe pjesa tjetër grant. Ky landfill mund të përballojë deri në 600 ton mbetje në ditë gjatë sezonit turistik dhe synon të zëvendësojë depon ekzistuese, që shpesh ka pasur probleme me zjarre.

Në Orikum po finalizohet impianti i trajtimit të ujërave të zeza me një investim prej 5.3 milionë euro, që pritet të shërbejë rreth 53 mijë banorëve nga shtatori. Në Roskovec, një projekt për menaxhimin alternativ të mbetjeve organike ka nisur përpunimin e tyre në pleh për tokat bujqësore, si pjesë e iniciativës “EU4CELC” për ekonominë qarkulluese, transmeton albinfo.ch.

Në sektorin e energjisë, projektet gjermane përfshijnë ndërtimin e linjës 400 kV Shqipëri – Maqedoni e Veriut, me vlerë 67.5 milionë euro, një investim strategjik që pritet të përfundojë brenda vitit dhe do të rrisë sigurinë energjetike të Shqipërisë, duke ulur humbjet dhe duke lehtësuar shkëmbimet me fqinjët.

Ambasadori Bergner nënvizon edhe rëndësinë e forcimit të kapaciteteve administrative dhe teknike për të siguruar që këto projekte të jenë të qëndrueshme edhe pas përfundimit të mbështetjes ndërkombëtare. Ai tha se mbështetja gjermane do të vazhdojë, veçanërisht në procesin e integrimit në BE, duke ndihmuar në zbatimin e legjislacionit evropian dhe në fushat prioritare si sundimi i ligjit, qeverisja e mirë dhe lufta kundër korrupsionit.

Gjermania mbetet partneri bilateral më i madh financiar i Shqipërisë që nga viti 1988, me investime që arrijnë rreth 1.2 miliardë euro, prej të cilave mbi 400 milionë vetëm gjatë dekadës së fundit. Ambasadori Bergner vlerëson këtë si një dëshmi të angazhimit të vazhdueshëm dhe serioz të Gjermanisë ndaj Shqipërisë, transmeton albinfo.ch.