Gjermania dërgon ushtarë shtesë në Kosovë

550 ushtarë do të dërgohen në Kosovë në kuadër të KFOR-it, para zgjedhjeve të Serbisë më 6 maj

Për shkak të zgjedhjeve serbe që po afrohen, dhe tensioneve  në rritje në veri të Kosovës , Bundesveri gjerman ka vendur dërgimin e përforcime shtesë për misionin paqeruajtës ndërkombëtar KFOR në Kosovë, që udhëhiqet nga NATO-ja,  raporton javorja gjermane, Spiegel.

Këtë vendim të NATO-s e kishin miratuar parlamentarët gjermanë të premten në mbrëmje.

Sipas Spiegel, 550 ushtarë do të dërgohen në Kosovë në kuadër të KFOR-it, para zgjedhjeve të Serbisë më 6 maj.

Pos kësaj, në Kosovë do të dërgohen edhe afro 150 ushtarë austriakë, për shkak të shqetësimeve se mund të shpërthej dhuna në pjesën veriore të Kosovës, të banuar me popullatë shumicë serbe.

Sipas Spiegel, trupat do të vendosen më 1 maj.

 Aktualisht në Kosovë gjenden 5800 ushtarë të KFOR-it, ndërsa prej tyre 1300 janë pjesëtarë të forcave të armatosura gjermane.