Gjermani: Nga taksat më të ulëta te çmimet më të lira të energjisë, plani i koalicionit të ri

Me krijimin e qeverisë së re në Gjermani, e përbërë nga CDU/CSU dhe SPD, qytetarët pritet të përfitojnë nga një sërë reformash që synojnë lehtësimin e barrës financiare të familjeve. Programi qeverisës parashikon ndërhyrje të gjera në politika tatimore, përfitime sociale, pensione dhe kosto jetese.

Lehtësime tatimore dhe mbështetje për punonjësit

Ndryshimet më të dukshme do të prekin sistemin tatimor, ku planifikohet një reformë që synon uljen e tatimeve për familjet me të ardhura të ulëta dhe të mesme. Megjithëse detajet ende nuk janë zbuluar, pritet që reforma të hyjë në fuqi në mesin e mandatit, pas rreth dy vjetësh, transmeton albinfo.ch.

Ndërkohë, nga viti 2026, qytetarët do të përfitojnë nga rritja e kompensimit për udhëtarët, duke u lejuar të zbritin 38 cent për çdo kilometër të parë të udhëtimit në punë. Kjo përfshin të gjithë udhëtarët, pavarësisht nga mjeti i transportit.

Gjithashtu, qeveria planifikon të përjashtojë nga taksat orët jashtë orarit që punonjësit bëjnë mbi normën me kohë të plotë, si dhe të shpërblejë financiarisht ata që kalojnë nga punë me kohë të pjesshme në të plotë.

Pensione dhe mbështetje për të moshuarit

Një risi tjetër është “pensioni për fillimin e hershëm”, që do të nisë në vitin 2026. Ai parashikon krijimin e një fondi pensional për fëmijët e moshës 6–18 vjeç që ndjekin shkollën, me kontribute mujore prej 10 eurosh që do të rriten me kohën dhe do të lirohen nga taksat deri në pension.

Një tjetër nismë është “pensioni aktiv”, i cili do t’u lejojë të moshuarve të punojnë pas daljes në pension dhe të fitojnë deri në 2,000 euro në muaj pa tatim, shkruan The Local.

Mbështetje për familjet me fëmijë

Elterngeld – ndihma për prindërit që ndalojnë punën ose reduktojnë orët pas lindjes së një fëmije – do të rritet, ashtu si edhe ndihma mujore për aktivitete jashtëshkollore të fëmijëve, nga 15 në 20 euro. Profesionistët e pavarur do të përfitojnë për herë të parë nga e drejta ligjore për pushim lehonie.

Çmime më të ulëta të energjisë dhe qirave

Përfitues të drejtpërdrejtë do të jenë edhe konsumatorët e energjisë, pasi taksat mbi energjinë elektrike do të ulen në nivelin minimal të lejuar në BE. Konsumatorët pritet të kursejnë nga 18 deri në 71 euro në vit, në varësi të konsumit.

Në të njëjtën kohë, frena mbi qiratë (Mietpreisbremse) do të zgjatet për të paktën katër vite të tjera pas vitit 2025, duke kufizuar rritjen e qirasë dhe ndëshkuar pronarët që nuk i respektojnë rregullat, transmeton albinfo.ch.

Studentët dhe të rinjtë përfitojnë gjithashtu

Grantet studentore BAföG do të rriten në dy faza, duke përfshirë edhe shtesën për banim, që do të kalojë nga 380 në 440 euro. Qeveria gjithashtu planifikon investime në strehim për studentët dhe kursantët, si dhe reforma që do ta bëjnë më të lirë marrjen e patentës për të rinjtë.

Një Gjermani gjithnjë e më dixhitale – edhe në pagesa

Koalicioni i ri dëshiron të lehtësojë pagesat pa para në të gjitha bizneset, përfshirë ato të vogla dhe të pavarura, duke sinjalizuar një largim të mëtejshëm nga ekonomia e parave të gatshme, shkruan The Local.

Në tërësi, plani qeverisës parashikon një rimodelim të thellë të politikave ekonomike e sociale, që do të ndikojnë drejtpërdrejt në jetën dhe financat e përditshme të qytetarëve në Gjermani, transmeton albinfo.ch.

---