Gjenevë: Policia qëllon për vdekje një burrë të armatosur me thikë

Një ngjarje e rëndë ka ndodhur të martën pasdite në lagjen Pâquis të Gjenevës, ku policia ka qëlluar për vdekje një burrë që sulmoi oficerë policie me thikë pranë Rue Rothschild. Lajmi është raportuar fillimisht nga Léman Bleu dhe është konfirmuar nga autoritetet vendore, shkruan 20minuten, transmeton albinfo.ch.

Sipas policisë, burri i armatosur me thikë iu afrua një patrulle dhe u përpoq të sulmonte disa oficerë. Megjithëse u urdhërua të lëshonte armën, ai refuzoi, çka çoi në ndërhyrjen e armatosur të forcave të rendit. Oficerët qëlluan tre herë mbi të, duke e plagosur për vdekje.

Pavarësisht përpjekjeve të shërbimeve të urgjencës për ta ringjallur në vendngjarje, burri ndërroi jetë. Zona u rrethua me kordon policor dhe një tendë e bardhë u vendos mbi trupin e pajetë, duke konfirmuar seriozitetin e incidentit.

Disa dëshmitarë okularë e kanë përshkruar momentin kur burri vrapoi drejt patrullës me thikë në dorë. Policia deri më tani ka konfirmuar vetëm një incident dhe nuk ka dhënë informacione shtesë mbi identitetin apo motivet e sulmuesit, transmeton albinfo.ch.